بعد رحلة بدأت من ما يقارب 6 شهور بتعلم فيها عن التسويق الإلكتروني حابة اني اعمل ملخص او شئ أقرب لانه يكون Presentation استعرض فيه المصادر التلاتة اللي اتعلمت منها ومميزات كل واحد من وجهة نظري ومناسب لمين .. اتمنى لكم الإفادة و قراءة ممتعة.
خلال الرحلة عديت علي 3 مصادر من اقوي مصادر التعلم الذاتي في مجال التسويق الإلكتروني, الا وهى:
- " أساسيات التسويق الرقمي من جوجل" واللي بيقدمه برنامج " مهارات من google "
- LinkedIn Learning الغني عن التعريف
- المصدرالتالت والاخير وصديق رحلتي من البداية وهو منصة يوداسيتي واللي بالرغم من جودة المحتوى التعليمي وعملية التعلم الا انه كان من الاسباب اني ادورعلي مصادر تانية ... هوضح ده بالتفصيل لما يجي الكلام عنه.
ملحوظة اي كلام تحته خط مجرد الضغط عليه هياخدك للصفحة الخاصة به.
مستعدين نبدأ ؟؟
يـــلا بينا
حابة ابدأ بالشئ المشترك بين الـ 3 مصادر هو ان المحتوى بتاعهم بيتقدم علي هيئة فيديوهات قصيرة واحياناً مقالات كمصادر اضافية.
الدورة مقدم من "مهارات من جوجل" وهو برنامج بيقدم دوارات تدريبية لتحسين المهارات في المجال الرقمي, وهي عبارة عن مجموعة دورات منفصلة مكونة من دروس وبيبقى في اختبار بعد كل جزء.
المميز فيها انها متاحة باللغة العربية ومجانية, و دراسة الحالة او ال studycases اللي فيها لشركات لمجالات مختلفة في الوطن العربي.
مناسب جداً لو لسه بتكتشف المجال او عندك بيزنس صغير وحابب تكتشف ازاي تحسن وجوده على الانترنت
نيجي بقي للمصدرالتاني الا وهو
وده بيقدم كورسات و Learning paths في مجالات كتير لكن اللي عليه الكلام دلوقت هو Become A Digital Marketing Specialist Learning path , المكون من 12 كورس باللغة الانجليزية ومتاح Subtitle باللغة الانجليزية.
LinkedIn Learning من مصادر التعلم المدفوعة, لكن لحسن الحظ وبسبب جائحة كورونا
Microsoft بالشراكة مع LinkedIn بتقدمه مع بشكل مجاني ضمن 10 Learning paths تانيين,
الاختيار ده مناسب جداً لو انت فعلاَ بدأ في المجال وفي سوق العمل ومحتاج تركز عن جزئية معينة المحتوي بيتقدم علي شكل كورسات منفصلة ممكن تختار منها اللي يناسبك, و مناسب لو انت مبتدئ لكن من وجهة نظري مش افضل خيار,لانه لحد ما مش بيراعي التدرج ومفيش مشاريع تشتغل عليها او حد يقيمها.
وهنا يجي الكلام عن اخر منصة اومصدر للتعلم وهو
يوداسيتي من اشهر مواقع التعلم الذاتي في العالم والبرنامج ده بالتحديد معمول بالشراكة مع اسماء كبيرة واساسية في المجال زي فيسبوك وجوجل, المحتوي باللغة الانجليزية ومتاح Subtitle باللغة العربية و اللغة الانجليزية.
البرنامج مدفوع لكن مبادرة مستقبلنا رقمي FWD بالتعاون مع يوداسيتي ووزارة الاتصالات وتكنولوجيا المعلومات المصرية بتقدمه بشكل مجاني على هيئة منحة مكونة من مستوايات بالاضافة لجزء خاص بالعمل الحر Freelancing باللغة العربية وبيقدمه مؤثريين من الوطن العربي زي صانع المحتوى م.أحمد ابوزيد " دروس اونلاين على اليوتيوب" و م.عبد العزيز الألفي مدرب معتمد من الجامعة الأمريكية في القاهرة, بالاضافة للقاءات اونلاين اسبوعية عن العمل الحر مع محترفين.
المنحة مكونة من 3 مستويات:
- المستوي المتحدي Challenger Track
ده مناسب انك تستكشف ومهم جداً في انك تعرف الاساسيات
ممكن تعرف اكتر عن المستوى ومحتواه او تقدم عليه من هنا: Challenger Track
المستوى التاني
- المستوى المحترف Professional Track
ومع المستوى ده هتبتدي تدخل في الجد شوية وهتطبق اللي بتتعلمه جزء جزء على مشاريع وهتتراجع ويجيلك تقيم عنها لحد ما تطبق كل الاجزاء بشكل مناسب.
ممكن تعرف اكتر عن المستوى ومحتواه او تقدم عليه من هنا: Professional Track
المستوى اللي بعد كده هو
- المستوى المتقدم Advanced Track
وده بيأهلك لانك تبقي محترف في المجال بجانب الدراسة بيبقي في لقاء بشكل اسبوعي مع حد من ال Digital Marketer المحترفين واللي عندهم خبرة في سوق العمل.
ممكن تعرف اكتر عن المستوى ومحتواه او تقدم عليه من هنا: Advanced Track
نيجي للسؤال المهم ليه اتعلمت من اكتر من مصدر؟
السبب بسيط لاني بدأت بالمستوى المتحدي من يوداسيتي ولما خلصته قدمت علي المستوى المحترف, كنت عارفة ان في كام اسبوع فرق ما بين ان اخلص مستوي ولحد ما اتقبل في المستوى اللي بعده, لذلك كان عندي رغبة في اني اكتشف المصادر الاخرى واقرر ايه المناسب ليا اني اكمل فيه.
بس كده ... ده الموضوع بشكل مختصر.
ممكن تكتبوا لي في التعليقات تحت 👇 رأيكم في الموضوع ولو في حاجة محتاجة توضيح
ومتنسوش تكتبوا اقتراحتكم لموضوعات تانية.
وأخيراً شاركوا المحتوى مع اصدقائكم اللي مهتمين بالتسويق الإلكتروني او اللي حابين يكتشفوا مجالات تانية.
My LinkedIn
My Canva Profile
تعليقات
إرسال تعليق